|
|
Bepoalens en regels veur t haaileg volk (18: 1-20:17)
|
Leviticus 18
01De HEER zee tegen Mozes:
02"Zeg tegen Isrelieten: 'Ik bin de HEER, joen God.
03Leef nait net zo as Egyptenoars, bie wèl ie woond hebben, en net zo min as Kanaänieten, doar ik joe hènbreng. Hol joe nait aan heur bepoalens
04mor volg mien regels op. Hol joe aan mien bepoalens en dou der noar. Ik bin de HEER, joen God.
05Mien bepoalens en regels geven leven aan dij ze noakomt. Dat zodounde: hol ze in eren. Ik bin de HEER.
06Gainent van joe mag ain van aigen bloud offrontaaiern. Ik bin de HEER.
07Ie maggen joen moeke nait besloapen, doar offrontaaier ie joen pa mit.
08Besloap n aander vraauw van joen voader ook nait. Doar offrontaaier ie joen voader mit.
09Besloap joen zuster nait, of ze nou joen pa zien dochter of joen moeke heurent is. Al is ze alderdeegs nait in zulfde hoesholden geboren as ie, ie maggen heur nait besloapen.
10 Besloap dochter van joen zeun nait, of dochter van joen dochter. Doar offrontaaier ie joezulm mit.
11 Besloap joen voader zien vraauw heur dochter nait, dij deur joen voader verwekt is. Zai is joen zuster ja en ie maggen heur nait besloapen.
12 Besloap joen voader zien zuster nait. Zai heurt ja tou t aigen bloud van joen voader.
13 Besloap joen moeke heur zuster nait. Zai heurt ja tou t aigen bloud van joen moeke.
14 Offrontaaier joen voader zien bruier nait. Ie maggen zien vraauw nait besloapen. t Is joen taande ja.
15 Besloap joen schoondochter nait. Zai is joen zeun zien vraauw en ie maggen heur nait besloapen.
16 Besloap vraauw van joen bruier nait. Doar offrontaaier ie joen bruier mit.
17 Besloap dochter van joen vraauw nait en dochter van heur zeun ook nait, of dochter van heur dochter. Zai heurt ja tou t aigen bloud en doarom zol dat n schaande wezen.
18 Ie maggen, noast joen vraauw, heur zuster nait as bievraauw nemen. Ie maggen aine zuster nait besloapen, zo laank as aander leeft.
19 Besloap n vraauw nait as ze onraain is omdat ze de regels het.
20 Moak joezulm nait onraain, dat ie aanderman zien vraauw besloapen.
21 Ie maggen noam van joen God nait ontwijden, dat ie ain van joen kinder aan Moloch ovvern. Ik bin de HEER.
22 Ie maggen nait op bèr goan mit n man net zo as ie mit n vraauw doun. Dat is n schandoal.
23 Moak joezulm nait onraain dat ie t doun mit n daaier. En n vraauw mag zok ook nait mit n daaier ofgeven. Dat is ja verdurven.
24 Moak joezulm nait onraain dat ie zukswat doun. Volken dij ik veur joe votjoag, hebben zok mit aal dij zoaken onraain moakt.
25 Doar is t laand deur onraain worden. Om wandoaden dij der oethoald binnen, heb ik t laand taaisterd, zodat t zien inwoners oetspijde.
26 Mor ie mouten mien bepoalens en regels in eren holden. Ie maggen gainain van dizze schandoaden begoan. Dat geldt veur geboren en getogen Isrelieten net zo goud as veur vremden dij bie joe wonen,
27 - mensken dij veur joe in t laand woonden, hebben dij schandoaden ook bedreven; doar is t laand onraain deur worden -
28 aans zel t laand joe oetspijen omdat ie t onraain moakt hebben, krekt as t volk oetspijd wer dat ter veur joen tied woonde.
29 Dij toch zo'n schandoad bedrift, zel tou gemainschop oetstöt worden.
30 Hol joe aan mien veurschriften en neem schandoalege gebruken nait over dij veur joen tied doan werden, dat ie der nait onraain van worden. Ik bin de HEER, joen God.'"
|
Leviticus 19
01De HEER zee tegen Mozes:
02"Zeg tegen haile gemainschop van Israël: 'Wees haaileg, want ik, de HEER, joen God, bin haaileg.
03Heb ontzag veur joen moeke en joen pa, en neem mien sabbat aaltied in acht. Ik bin de HEER, joen God.
04Geef joe nait òf mit ofgoden en moak gain godenbeelden. Ik bin de HEER, joen God.
05As ie de HEER n vree-ovver aanbaiden den mout ie, zel t ovver aanveerd worden,
06t vlaais eten op dag dat t daaier slacht wordt, of op dag der noa. Wat ter op daarde dag overbleven is, mout opbraand worden.
07As ter op daarde dag nog van t ovvervlaais eten wordt, is dat schandoaleg en zel t ovver nait aanveerd worden.
08Dij der van et, mout gevolgen van zien zunde ondervinden. Dij het ontwijd wat de HEER zienent is en zel tou gemainschop oetstöt worden.
09As ie koorn inhoalen, zicht den nait haile raand van akker en zammel nait bie nkander wat ter liggen blift.
10 En as ie in droevetoen droeven plokken, loop den nait ales nog n moal noa en pak nait op wat op grond valen is. Loat t liggen veur aarme lu en veur vremden. Ik bin de HEER, joen God.
11 Steel nait, laig en bedraig nkander nait.
12 Dou gain vaalze aid as ie bie mien noam sweren. Doar ontwijd ie noam van joen God ja mit. Ik bin de HEER.
13 Beroof gainent en naarsk n aander niks òf. Betoal ain in daghuur zien loon op aigenste dag oet.
14 Vervluik ain dij doof is nait en leg niks in pad van ain dij blind is. Heb ontzag veur joen God. Ik bin de HEER.
15 Trek gain pertij as ie rechtspreken. Minderman mout ie nait veurtrekken en meerderman nait noar ogen kieken. Berecht n aander noar eer en gewaiten.
16 Breng aandermans levent nait in gevoar deur hom over n badderij te brengen. Ik bin de HEER.
17 Wees nait hoatdroagend. As ie wat tegen ain hebben, roup hom den dat e rekenschop oflegt. Load nait om dij aander schuld op joe
18 deur vroak op hom te nemen of kwoad te blieven. Nee, net aansom: ie mouten aander laifhebben, krekt as ie joe zulm laifhebben. Ik bin de HEER.
19 Dou noar mien bepoalens. Loat gain twij soorten vij mitnkander poaren. Zaai joen akker nait in mit twij soorten zoad. Droag gain klaaier dij weven binnen mit twij soorten goaren.
20 As n man n sloavin besloapen het dij veur n aander man bestemd was, mor ze was nog nait vrijkocht of vrijloaten, den mout e schoadevergouden betoalen. Ze huiven nait doodmoakt worden, want vraauw was nog nait vrij.
21 Man mout as schuldovver veur de HEER n ram noar ingang van soamenkomsttènt tou brengen.
22 Deur ram veur de HEER te ovvern, dut priester verzoenen veur dij man wegens datgene doar hai zok schuldeg aan moakt het, en krigt e vergeven van zien zunde.
23 As ie ainmoal in t laand binnen dat ik joe geven zel en ie doar vruchtbomen poten, mout ie eerste vrucht hangen loaten. Eerste drij joar mout ie vrucht hangen loaten en mag ie der nait van eten.
24 t Vaaierde joar is ale vrucht bestemd veur n feest om de HEER te daanken.
25 t Viefde joar mag ie vrucht eten. Opbrengst zel des te groder wezen. Ik bin de HEER, joen God.
26 Eet gain vlaais doar nog bloud in zit. Loat joe nait in mit woarzeggerij of wolkenkiekerij.
27-28 As ie n dode te betreuren hebben, scheer den joen hoar aan kanten van kop nait vot en knip gain stokken tou board oet, kaarf joe gain taikens in t liggoam en tatoeëer joe nait. Ik bin de HEER.
29 Ontwijd joen dochters nait deur heur veur hoer speulen te loaten. Aans verspraaidt ontucht zok onder t volk en zel t haile laand ain onfersounleke boudel worden.
30 Neem aaid mien sabbat in acht en heb eerbied veur mien haailegdom. Ik bin de HEER.
31 Roadpleeg gain gaisten of schimmen van doden. Wèl dij opzöcht, moakt zokzulm onraain. Ik bin de HEER, joen God.
32 Goa stoan veur grieskoppen en heb respekt veur heur. Heb ontzag veur joen God. Ik bin de HEER, joen God.
33 Ain dij as vremde in joen laand touholdt, mag ie t levent nait zoer moaken.
34 Behandel vremden dij bie joe wonen as geboren Isrelieten. Heb heur laif as joezulm, want ie hebben zulm in Egypte ja as vremden leefd. Ik bin de HEER, joen God.
35 Knooi nait mit lengtemoaten, gewichten en inholdsmoaten.
36 Bruuk n zuvere schoal mit zuvere gewichten, n zuvere efa en n zuvere hin. Ik bin de HEER, joen God, dij joe tou Egypte oethoald heb.
37 Hol joe aan aal mien bepoalens en regels en dou der noar. Ik bin de HEER.'"
|
Leviticus 20
01De HEER zee tegen Mozes:
02"Zeg tegen Isrelieten: 'As n Isreliet of n vremde dij in Israël woont ain van zien kinder aan Moloch ovvert, mout e doodmoakt worden. t Volk mout hom mit stainen doodgooien.
03Ikzulm zel mie tegen zonent keren en hom tou gemainschop oetsteuten, omreden hai het ain van zien kinder aan Moloch ovverd en doar mien haailegdom mit onraain moakt en mien haailege noam ontwijd.
04Mog t volk n oogje dichtkniepen as zo'n man zien kinder aan Moloch ovvert en hom nait doodmoaken,
05den zel ik mie zulm tegen dij man en zien volk keren. Ik zel hom en aalmoal dij zok mit hom en mit Moloch inloaten, tou gemainschop oetsteuten.
06Dij zok inlet mit gaisten en schimmen zel ik ook stravven en oetsteuten.
07Denk ter om dat ie haaileg binnen en haaileg blieven, want ik bin de HEER, joen God.
08Hol joe aan mien bepoalens en dou der noar. Ik bin de HEER, ik haaileg joe.
09Dij zien pa of zien moeke vervlökt, mout doodmoakt worden. Hai het zien aigen pa of moeke vervlökt en het dood aan zokzulm te wieten.
10 Dij klongelt mit n traauwde vraauw, aanderman zienent, mout doodmoakt worden. Aalbaaident mouten ze doodmoakt worden, zowel zo'n man as zo'n vraauw.
11 Ain dij vraauw van zien voader beslept, offrontaaiert zien voader. Man en vraauw mouten aalbaaident doodmoakt worden. Ze hebben dood aan zokzulm te wieten.
12 As ain zien schoondochter beslept, mouten ze baaident doodmoakt worden. Ze hebben zok schaandelk gedroagen en hebben dood aan zokzulm te wieten.
13 Dij net zo slept mit n man as mit n vraauw, begaait n schandoal. Aalbaaident mouten doodmoakt worden. Ze hebben dood aan zokzulm te wieten.
14 Dij mit n vraauw traauwt en ook mit heur moeke, begaait n schandoal. Hai en baaide vraauwen mouten opbraand worden. Zokse schandoalen maggen bie joe nait veurkommen.
15 Dij t dut mit n daaier, mout doodmoakt worden. En t daaier ook.
16 As n vraauw zok ofgeft mit n daaier, mout vraauw doodmoakt worden en t daaier net zo goud. Ze mouten doodmoakt worden. Ze hebben dood aan zokzulm te wieten.
17 As ain mit zien zuster traauwt, of ze nou zien voader zien dochter of zien moeke heurent is, en hai beslept heur, is dat n schandoal. Veur t oog van elkenain mouten ze oetstöt worden. Zonent het zien zuster besloapen en mout gevolgen van zien zunde ondervinden.
|
|
